Kaupapa: Waka Ama

Ko te tūmanako nui a tētahi tuākana teina whakahokia mai o rāua hoe i whānakohia

Heeni Brown

He kaha nō Te Huia rāua Tawera Taylor ki te tutuki i ngā whakangungu e tika ana mō te Whakataetae Waka Ama ā-motu ki Karāpiro.

Engari ināianei, ka anga atu rāua ki te whai i ō rāua hoe-motuhake kātahi anō ka riro ki te ringa tāhae.

Nō te Rāhoroi ki Pukekohe, ka ngaro tētahi motuka ki te ringa tāhae, ā, ahakoa kua hoki mai te motuka ki a rāua, e ngaro tonu ana ētahi tino taonga.

Hei tā Te Huia Taylor, “Koira te tino mea tino pouri.  Ia rā, ia rā hoe mātou, ko ērā ō mātou hoe.  Nā reira he āhuatanga rerekē mēnā tīni te hoe.”

Ki tā Tawera Taylor, “Nā te mea kua mau nei ērā hoe mai i te wā e tekau mā rima ōku tau nā reira kua riro ināianei, ko te tūmanako ka hoki mai!  Engari kāre au e mōhio mēnā ka kite i taua hoe anō.”

I riro ngā hoe e rua a Te Huia rāua ko Tawera Taylor.  Āe, he whā rau tāra te utu ki te hoe kōtahi, engari he uaua mā ēnei tokorua te hanga i ngā hoe pēnei nā te momo.

I hanga ngā hoe nei mō ngā reihi o te whakataetae o te ao ki New Caledonia e rima tau ki muri, ā, mai i taua wā kua whakamahia e rāua ēnei hoe.

E ai ki a Te Huia Taylor, “Koira te mea anake e pīrangi ana mātou mai i tērā waka ērā atu mea e pai ana. Koira te mea nui nā te mea ngā maumaharatanga kua hono ki aua hoe, nō reira koa whakahokia mai!”

Ko te tūmanako nui a ēnei tuākana teina ka hoki mai o rāua hoe. 

Hei āpōpō tonu ka wehe atu rāua ki Karāpiro mō ngā reihi wātea o te whakataetae ā-motu.