Ko Tāmaki ngā toa o te whakataetae rīki rangatahi

Rahia Timutimu

Nā ngā toa o te reanga o tera tau a Waikato, i whakatakoto i te wero kia Tāmaki Makaurau. Ā, ko Tāmaki anō tēra i eke tuatahi i te rārāngi piro i te meneti tuatahi rawa o tēnei whiringa toa.

Heoi i hoki mai a Waikato he kotahi meneti whai muri iho, kia ū a Tautau Kapea ki te kokonga matau. Ko Joshua Uta tētahi kaitākaro toa o tēnei tukinga, ā, nei ko te tuatahi o āna whakawhitinga e toru i te rārangi piro.

Otirā, i kaha tonu a Tāmaki, i eke anō e toru ngā wā kia arahi i te wehenga rua, rua tekau mā waru ki te whā.

I te haurua tuarua, i pēra tonu te tākaro a Tāmaki, ko Maccane Marychurch raua ko Joshua Uta tēra i āwhina i tō raua kapa kia arahi ai a Tāmaki Makaurau mā ngā piro toru tekau mā ono.

Heoi, pakanga ururoa ana a Waikato, tutuki ana ngā piro e toru i ngā meneti tekau whakamutunga o te tukinga.

I te mutunga iho, he kai huare kē mō ngā toa o tērā tau, wikitōria ana a Tāmaki, whā tekau ki te tekau mā waru.