Kaupapa: Netball

Ko Pulse te kapa toa o te motu i tēnei wā

Rahia Timutimu

Ki te poitarawhiti, kua kaha anō ai te kapa Pulse i te whakataetae poitarawhiti ANZ o Aotearoa, i mieretia a Waikato Bay of Plenty Magic e rātou, ono tekau mā tahi ki te whā tekau mā ono ki Kirikiriroa.

Koinei te wikitōria karapīpiti tuawhā a Pulse, koinei te wā tuatahi kua eke ai te kapa ki tēnei taumata i ngā tau tekau mā tahi, ā, kei raro rawa a Magic e putu ana, kāre anō rātou kia wikitōria i tētahi tukinga i tēnei tau.

Tekau mā rua ki te tekau ngā tatauranga whakamutunga ki ngā manuhiri, heoi anō koira noa te wā i tata ai te haukainga ki te hoariri, i te wehengarua ko Pulse tērā i mua mā ngā tatau tekau. Nā wai i kaha ka kaha kē atu te kapa, kia koke tonu ai a Pulse i te tēpū whakataetae, kei mua tonu i a Steel mā ngā tatau e whā.