Ko ngā Tactix ngā toa o tā rātou tukinga ki a Central Pulse

Rahia Timutimu

I te hiahia te kapa Magic kia noho hinga kore tonu ai rātou i tēnei tau, heoi ko te tākaro ki Ahitereiria ehara i te mea māmā noa.

Me te whainga kia puta ai te ihu i ngā hauwhā e whā, i māmā ekea taua hiahia i te ngāwari noa o te tuku i te pōro mai i te rohe puku ki te pou kuru. Hēoi, i reira tonu ngā Vixens e aruaru ana.

Ahakoa te manahau o ngā Vixens, i mauri tau tonu te Magic i raro i ngā arahitanga a ngā Rarauwhe Hiriwa a Casey Kopua rāua ko Leana de Bruin.

Koinei te haerenga tuatahi a Magic ki Ahitereiria i tenei tau, ā, i oti mai i runga i te wikitōria mā ngā piro e rima, kia noho tonu ai rātou ki te kouru o te tēpu whakataetae. Koinei te hinganga karapīpīti tuarua a ngā Vixens i te kainga

Ki te tukinga tuarua o te pō, e mōhiotia whānuitia ana ko te kapa Pulse tētahi kapa ka eke ki ngā whiringa, whai muri i ngā wikitōria e rua kua taha ake nei.

Karekau he wikitōria mā te kapa Tactix, ko rātou tonu a raro i te tēpu whakataetae

I māmā noa mā te kaikuru Tactix mā Mwai Kumwenda te kuru, heoi i pērā anō ngā hua i tēra atu pito o te kōti, i ngā tautohito kuru o te kapa Pulse i a Irene van Dyk rāua ko Donna Wilkins.

Ahakoa i mua kē te Pulse mā ngā piro e ono i te wehenga rua, i tata kē ngā kaute i te hauwhā whakamutunga, ā, nā te kaha āraihia o Kumwenda, ka mate kē te kāpene a Anna Thompson ki te tuku i ngā kurunga.

I te mutunga iho, i toitū a Tactix, kia wikitōria ai rātou i tā rātou tukinga tuatahi o te tau.