Kaupapa: Netball

Ko ngā Tactix kei runga

Ruth Smith
  • Tāmaki Makaurau

E arotahi ana te kapa Mainland Tactix ki te kaupapa i tēnei tau me te toanga tuarua o te whatinga nō nā pō nei.  I hinga i a rātau te kapa Northern Mystic e 42-39. 

Kitea ai te tauira o te arahi i ngā kāpene e rua o ngā kapa, a Anna Harrison, nō te kapa Mystic, rāua ko Temalisi Fakahokatau me ā rāua mahi ki te tiaki i te poi.  11 ngā haukotinga whiu a te kapa Mystics, ki ngā haukotinga e 7 a ngā Tactix.  Pau ana te wā, ko Fakahokatau tērā i tapaia hai kirikawa mō te kēmu he kaha nō tana tute.

I mua te kapa Mystics e haere ana i te tīmatanga o ngā mahi, ā, toa ana ko rātau i te koata tuatahi, e 8-12.  Ahakoa uru atu ai a Rarauhe Hiriwa, a Maria Folau ki te kēmu kāre tonu te kapa Mystic i koke whakamua.  I whāia e ngā Tactix mō te hemo tonu atu ā oti noa, kia ōrite ai ngā tautauranga, 19 ki tēnā, ki tēnā i te weheruatanga.

He kaha nō te tuki a ngā kapa i kore ai ngā ihu o tētahi kapa i tino puta.  Ko taua āhuatanga anō rā, ko te ōrite o ngā tatauranga i te mutunga o te wāhanga tuatoru.  Heoi anō i te mutunga iho kitea ai te wikitōria i roto i ngā tatauranga tītere, tērā ko te kapa Tactix i toa i ō rātau pironga e 42/54, ā, ko ō te kapa Mystics e 39/55.

Ko ngā Northern Mystics ērā ka pakanga ki ngā Northern Stars i te kēmu tuatahi o te Auckland Challenge ka tū hai te Pōtapu.