Kaupapa: Rugby

Ko ngā Ika a-Whiro i te Mitre 10

James Perry

Nō te rangi nei whakarewa ai whakataetae whutupōro Mitre 10 Cup. Kua hoki mai ētahi ika ā Whiro, whanake ai i ngā ika tauhou. 

Ko te Ōpango ō mua, ko Tanerau Latimer tētahi o aua kaitākaro. Kua hoki mai te uri o Tapuika ki tōna ōrokohanga ki te kapa o Bay of Plenty. Kua 4 tau ia tākaro ana ki tāwāhi. 79 ōna tākaro mō ngā Steamers i mua i tōna wehenga ki Hapāni i te tau 2014. Ahakoa tōna kī kia Paul Tupai ka eke ia ki ngā kēmu 100, pērā ki a Tupai, ka kore pea ia e eke ā-kaitākaro nei, heoi ka eke ā-kaiako. Ko tā Latimer titiro, ka noho ia hei poutautoko mō ngā kaitākaro hou. 

Ehara ko Latimer te ika a-Whiro anake ka mau i ngā poraka Bay of Plenty in tēnei tau, kua hoki mai anō a Mike Delany, 36 tau te pakeke. Hei tā Latimer, mā Delany e pakeke ai te hanga o te kapa, heoi nōna e tākaro tuatahi ai mō ngā Steamers i te tau 2004, he 7 noa te pakeke o ētahi o ōna hoatākaro hou.

Ko te Ōpango Māori ō mua, ko Thomas Waldrom tētahi atu kua hoki mai ki te kainga tākaro ai. Kua noho ia ki Ingarangi mō ngā tau e 8 kua hōri, ka mutu i eke ki te kapa matua o Ingarangi anō hoki. Ka tākaro ia mō tōna kapa ō mua, mō Wellington. Hei tāna, ko te hoatu i ngā wheakoranga kua riro i ā rātou te mea nui. He uaua ka kite i ngā kaitākaro pakeke i te whakataetae Mitre 10 i ēnei rangi, heoi mā te urunga atu o Waldrom me Latimer e whanake ai i ngā torekaihuruhuru.

I kapo i a Taranaki i te hiriwa Ranfurly tērā tau, kua kaupare rātou i ngā wero i a Poverty Bay me Wanganui i roto i ngā wiki tata nei. Ka mutu ko rātou hoki tētahi kapa ka riro i ngā wheako o Ōpango ō mua. Kua piri anō te Ōpango o mua, a Jarrad Hoeata ki ngā Pūru o Taranaki. Hei tā te kāpene, hei tā Mitchell Crosswell, kāpene o Taranaki, kāore i kō atu i ngā ika a-Whiro e whakaako i ngā āhuatanga o te whutupōro ngaio ki ngā ihupuku.

Hei te Rāpare o tērā wiki tīmata ai te whakataetae Mitre 10, ki Te Rakipaewhenua, arā ko te haukainga ka tuki ki ngā piritata, ki ngā Taniwha o Northland.