Kaupapa: Rugby League

Kikī ana te kapa Kiwi rangatahi i ngā kaitākaro Māori i eke pai i te whakataetae NYC

Kikī ana te kapa Kiwi rangatahi i ngā kaitākaro i eke pai i te whakataetae NYC i tēnei tau, ā, ko tētahi o rātou e whakarite ana i tana ekenga tuatahi ki te kapa rangatahi nei ka tuki atu ki te kapa Kangarū rangatahi ki taiwhanga o Mt Smart āpōpō e rua tau noa ia e tākaro ana i te rīki.

He momo Benji Marshall anō pea tēnei?

He kaitākaro whutupōro ō-mua, he kaitākaro pā whutupōro mō Aotearoa hoki a Te Maire Martin nō Ngāti Kahungunu engari e rua tau noa ki muri ka whakamātau ia i te rīki.

I nuku atu ia ki Ahitereiria i tērā tau kia kuraina ki Keembra Park High, i wikitōria rātou i te whakataetae ā-motu mō ngā kura tuarua kātahi ka whiwhi ia ki tētahi kirimana ki te kapa West Tigers mō tā rātou kapa i raro iho i te rua tekau tau mō tēnei tau.

Mārakerake ana te kitea, e ohorere tonu ana a Te Maire i tana pikinga i tēnei tau me tōna tohunga ki te kapa Kiwi rangatahi.

E koa ana hoki te ngākau o tana hoa tākaro Tigers a Manaia Cherrington kia hoki mai ki Aotearoa ki tēnei kapa, e ārahina e ia hei te pō āpōpō.

I tākaro a Manaia i te kapa i hinga i te kapa Kangarū rangatahi i tērā tau, ahakoa ko rātou kē te ihu i mua mō tētahi wā.

Nā te urunga mai o ngā mahuri tōtara me te haruru o te hau kāinga, ka whai utu pea te kapa Kiwi rangatahi.