Kaupapa: Rugby

Kei te whakareri te kapa whutuporo U20 mō te Ipu o te Ao

Kua tīmata te kapa whutupōro rua tekau tau me heke iho o Aotearoa i tā rātou hīkoi ki te ipu o te ao.

Nō te rangi nei whakakotahi ai ngā kaitākaro toru tekau ki Tāmaki Makaurau i mua i te whakataetae Oceania ki Ahitereiria hei tērā wiki.  Ki waenganui hoki i te kapa ko tētahi uri o Ngāi Tūhoe.

Kua tae moata mai a Hana Koko ki ngā kaitākaro.  Ki tā Otere Black, “Tino waimarie mātou ka tiki i te maha o ngā gear mai i a Adidas.”

Mō Otere, kāhore anō a Hana Koko kia wehe noa.  Koinei tana tau tuatahi hei kaitākaro i te kapa whakawhanake o ngā Hurricanes, ā, koinei hoki tana urunga tuatahi ki tētahi kapa o Aotearoa.

E ai ki a Black, “Tino harikoa kua tae mai ki tēnei tīma, kua roa te wā e tatari mō tēnei, nā reira tino harikoa te ngākau tino harikoa te whānau."

Ka tākaro a Aotearoa ki ngā kapa nō Hapanī, Hāmoa me Ahitereiria hei tērā wiki, he whakarite mō te Ipu Whutupōro o te ao ki Itari hei te Pipiri.

Nā te ngoikore o te kapa i ngā ipu o te ao e toru kua hipa, kotahi noa te aronga mō Otere me te kapa.

Hei tā Otere Black, “Ko te wini i te whakataetae nui, koina te whainga nui engari ka tīmata mātou i konei.  He wiki nui kei te haere mō mātou.  Ka haere ki Ahitereiria, ka tākaro ētahi kēmu ki reira, engari ko te mea nui ko te kapu o te ao.”

Ko te manako o Otere, ka kawea tonu tana tau hira ki te kapa rua tekau nei.