Kaupapa: Waka Ama

Kei te whakapeto ngoi ngā tira Waka Ama o Aotearoa ki ngā whakataetae IVF

Rahia Timutimu

E kātata ana tātou ki te whakamutunga o ngā whakataetae nei. Tērā ngā kapa nō Aotearoa kei te nuinga o ngā whiringa whāiti o tēnei rā, ā, he nui ngā tūponotanga e pōhiritia ai e Aotearoa ētahi mētara anō i a rātou ka hau atu ki ngā whiringa toa ka takina ai āpōpō.

I tēnei rā i kitea ai ngā whiringa whānui o ngā rēhi 1000m mō ngā kapa takiono, ngā momo rēhi tonu e whakamātautautia ai te nanakia o ngā kapa ki te whakaripiripi, arā ki te huri i ngā poito kei ngā ara rēhi tahi nei me ngā whiringa whāiti o ngā rēhi takitahi.

Aua atu, hāunga ngā tauwhāinga, inapō i whai wāhi ai ngā whenua katoa ki te whakatairanga i ō rātou anō ahurea e whītiki ai ngā iwi i runga i te wairua matakuikui.

Tō tātou mōhio ai ka haruru i ngā kapa o Aotearoa te whenua, he tokomaha i taetae mai ai mō te ahurea Māori tonu, te take.  Ehara i te mea i haruru harore rangitahi noa iho ai a Aotearoa ki te atamira, heoi anō he kātuarehe hoki ki tai.

Ko Taikura tētahi o ngā ika-i-te-ati i te rā nei, nōna i whakawhiwhia ai ki te wā tere tuarua mō ngā hoenga takitahi o te hunga taipakeke o raro iho i te 19 tau, he ira rima iwa hēkona noa iho tōna tawhiti tēnā i te uri nō Tahiti.

He 33 katoa ngā whiringa toa ka takina āpōpō, nō reira, kāore e kore ka hake ngā kakī i te maha o ngā mētara ka reia ki ō Aotearoa kakī i te 24 hāora.