Kaupapa: Waka Ama

Kei te whai tūranga anō tētahi kapa tamariki ki ngā Whakataetae Waka Ama

Wepiha Te Kanawa
  • Waikato/Te Waiariki

He whakangungu te mahi o te Karapu Waka Ama o Rāhui Pōkeka ki te Roto o Puketirini mō te whakataetae Waka Ama ā motu ki Karapiro a tērā wiki.

Kua whai tūranga ngā kapa tamariki nohinohi ki ngā whiringa toa i ngā tau e whā kua pahure, ā, e tūmanako ana rātou ka ora tonu taua āhuatanga.

Ahakoa he iti he whakariterite te mahi a ēnei kaihoe pakupaku, mō tētahi wero nui.

Ki tā te Kaiako o te kapa, a Kiki Kihi, “Ngā pīpī paopao e kī ana ko tō matou tima pepi, Puketirini paopao, ana ko Puketirini Puhi, ana ko Puketirini putiputi nō reira ko ēna katoa i raro mai i te reanga e kī ana ko ngā Midget girls.”

“Waimarie mātou te uru ki ngā wāhi e whai mētara ai, e hākoakoa ai ngā tamariki, ā, kua āhua waea rātou ki tērā āhuatanga nō reria kua hiahia rātou, ia tau kua whakapono ratou me pēnā rawa tā rātou pakariki, tā rātou kaha. Nā konā, nā taua hua pea i te timata kua kite rātou i tētahi taumata me pera rawa te eke.”

Marama kē ana a Arihia me tana tīma, he aha ngā wāhanga me whakapakari.

Hei tā Arihia Kihi, “Ki te kōrero ki taku tīma, me te hoe tere.”

Tika ana te kōrero, "kāore te kumara e korero mō tōna reka."

Kua whai tūranga rātou ki ngā whakataetae ā motu mō ngā tau e whā kua hori, e ai ki a Kiki ko te mahi tahi te tino.

E ai ki a Kiki Kihi, “E mōhio ana rātou , ko tā Te Puea i kī ai i aua rau tau "Kaua te waka e hukere, kaua te waka e kukume, engari kia tūpara nei te hoe" kia kotahi ai te hoe, ā, mārama pai ana ki a rātou ki te kotahi mai te hoe, kotahi mai te whakaaro, kotahi mai te taki, kotahi mai te whainga ka māmā kē ake te rere, te rewa o te waka.”

Hei tērā wiki timata ai ngā whakataetae Waka Ama ā-Motu ki te Roto o Karapiro, ko te tumanako ki reira te wikitōria.