Kei te tū te whakataetae 'Battle of the Fittest' kia kimi ai i ngā tāngata nakawhiti rawa atu o Aotearoa

Wepiha Te Kanawa

Ko 'Battle of the Fittest' tētahi whakataetae e kimi ana i te wahine me tāne nakawhiti rawa atu o Aotearoa.

I ngā tau e rua kua hori, he uri Māori kua kapo ake i tēnei taitara, ā, i tēnei tau, tērā tētahi Māori anō e hiahia ana ki te hiki i te mānuka. 

Ko ia ko tētahi o ngā whakataetae whakapau kaha o Aotearoa nei, a-tinana, a-wairua hoki. He whakakotahi i ngā mahi hiki taumaha me te omaoma.

He tuatahitanga tēnei whakataetae mō Stacey Lee- Siataga, hei ko tāna koinei te whakataetae uaua rawa atu mōna.

E ai ki a Stacey Lee-Siataga, “I aro tēnei whakapakari tinana ki te tinana o runga, mai ngā pana whakarunga o ngā pokohiwi ki ngā peke taura, he tino uaua mo te tinana.”

Ko te uri o Ngāti Tūwharetoa a Aaron James te toa nakawhiti i te tau rua mano tekau mā rua, hei ko tana kua piki haere te taumata o ngā kaiwhakataetae.

Ko Aaron James tērā e mea ana, “Te nuinga o ēnei tāngata he tohunga ki ēnei mahi, ā, kua rangatira rātou ki te whai ito.”

I tērā tau ko Mahdi Te Heuheu nō Taupo te toa nakawhiti o te motu. I tēnei tau e hiahia ana te uri nō Tūhoe a Joe McCormack ki te pupuri ki taua ōhāki Māori.

Hei tā McCormack, “Kei ia tāngata te kaha ki te mahi i ēnei mahi heoi ko te Māori ngā tino momo ki te whai i ēnei mahi, ki te eke hoki ki ngā whakataetae o te ao.”

E manako ana a Joe ka eke ia ki ngā tūranga o runga.

E ai ki a McCormack, “Te rā tuatahi i tino eke ahau, inanahi i pā mai te mauiui heoi tērā karo tērā. I piki, i heke ahau i roto i te papa kaute, koira te ahautanga o te papa kaute. A tōna wā ka kite pea.”