Kei te tihi tonu ngā NZ Breakers o te whakataetae ANBL

I te rauna 15 o te whakataetae ANBL, pau rawa te kotahi mēneti ka riro ngā piro tuatahi a te kapa Breakers, me te aha, mārama ana te kite mā te wāwāhi anake i ngā kaiārai e whai hua ai rātou.

He maha ngā hapanga a ngā 36ers, he pānga nā te kaha ārai a ngā Breakers.

Ā, i noho kaute-kore te taha haukāinga tae noa atu ki te haurua o te hauwhā whakamutunga, ki te wā i whiwhi ai tēnei piro tuatahi ā rātou.

Heoi i mua i te wehenga rua, i kātata ngā kaute, nāwai ka ōrite i te tangihanga o te whio, 38 ngā kaute ki ia kapa.

Nā taua taurite i huaki ai ngā Breakers i te hauwhā tuatoru, ā, tē tauritea ai anō piro e ngā 36ers - riro ana te 24 piro ki ō Adelaide 10 piro.

I te hauwhā whakamutunga ko taua āhua anō hoki atu, hoki atu, he kawe tonu i taua rangatiratanga nō te hauwhā tuatoru. I riro i a Mika Vukona ngā piro 16, hei hāpai i tana kapa ki te wikitoria: 84-66.

Hei tēnei Rāpare ka tuki atu rātou ki te kapa Sydney Kings ki te kāinga.