Ngā kaupapa: Māori Sports Awards, Rugby

Kei te rārangi whiringa toa a Tyla Nathan-Wong mō te wā tuarua

Rahia Timutimu
  • Tāmaki Makaurau

Ko te nuinga o ngā toa ā-ao nei, kua kōwhiria ki ngā wāhanga e rua.  Ko te toa takiwhitu a Gillies Kākā, ko te kāpene Tōkena Pango a Brad Rona rātou ko te kaitua rākau ko Jason Wynyard kei te wāhanga o "Te Tama a Tānenui-a-Rangi" mō te Toa Tāne Pakeke, ā, ko te kaihoe waka a Lisa Carrington me te toa takiwhitu wāhine a Kayla McAlister ka piri atu ki a Suzie Bates i roto i te wāhanga o "Hineahuone" mō te Toa Pakeke Wahine.

Ko te whetu momoho o te kapa takiwhitu wāhine o te motu a Tyla Nathan-Wong hoki, kua kōwhiria ki ngā wāhanga e rua, tērā mō te "Tamāhine a Papatuānuku" mō te Toa Tākaro Wahine Rangatahi me te wāhanga mō te tohu a TPK  i ngā Toa ā-Ao.

Ko Tyla Nathan Wong tētahi o ngā pōtiki i te kapa Wāhine Takiwhitu o Aotearoa, tekau mā iwa tau noaiho tōna pakeke, heoi he toki tonu ia ki te kapa. Kua hāerere ia me te kapa ki Whīti, Dubai, Haina, Amsterdam me Rūhia.

Ko tā te pāpā o Tyla ko David Wong, “kei te hari katoa tōna whānau mo tana tamahine, kihai rātou i whakapono ka eke ia ki ngā taumata pēnei i roto i āna mahi hakinakina, heoi he wahine e kaha whakapeto ngoi i roto i āna mahi katoa."

Kei Dubai tōna kapa i tēnei wā i te whakataetae tuatahi o te tauwhāinga takiwhitu wāhine IRB, heoi e hïkaka ana tōna whānau i tāna angitū i te ao hākinakina.

Koinei te tau tuarua kua whakaingoatia a Tyla ki Ngā Tohu Tākaro Māori o Aotearoa ki te wahanga mō te "Tamāhine a Papatuanuku". Kāore ia i whiwhi i tēnei taitara i tēra tau, heoi e ngākau māia tōna whānau ka wikitōria ia i tēnei tau.

Nā te angitū a Tyla i te ao hākinakina, kua riro ko ia hei tauira ki ōna teina a Shee raua ko David.

Rāua tahi kua noho hei kanohi mō Tāmaki Makaurau, ā, e hiahia ana rāua kia rite ki a Tyla.

Ka haere ngātahi a Tyla me tōna whānau ki te pō tuku taonga i tēnei Hātarei.