Kei te piki haere te maha o ngā kaitākaro Tag

Wikitōria Day
  • Tāmaki Makaurau

He kaupapa kua hōrapa haere ki ngā kura tuarua huri noa i te motu, ā, hei tā tētahi o ngā kaiwhakahaere o tēnei takunetanga, he huarahi tēnei e tupu ai, e ora hoki ai tēnei hākinakina.

Hei tā Claude Iusitini, te kaiwhakahaere o tēnei taiopenga tāngata, “nō te ohu riiki o Tāmaki Makaurau me Tag Aotearoa te whakaaro nui kia tu ake rā tētahi mahere e akiaki ai ngā tamariki ki te tākaro tēnei kēmu ka tahi, ka rua ki te rongo ake rā rātou i ngā painga o te hauora ki te tangata”

Hēoi anō rā, i waenganui i te mātotoru o ngā kapa, ko Te Kura Māori o Ngā Tapuwae. Ahakoa te uaua o ngā kēmu, i pakari tonu te tū.

E ai ki a Mānia Mārika, nō Ngāti Kahu "I tino pai, engari kei te hiahia tātau ki te whakapakari i ō mātau pūkenga, me kī te whiu ki taku hoa, te kukume i ngā tags"

Me te mea anō hoki rā, ko te painga o tēnei rangi, ko te rahi o ngā pūkenga e taea ai e rātau te whakamātau.

Hei tā Irirangi Taylor o Ngāti Awa i a ia e kōrero ana mō ngā mea pai o tēnei kemū "Te oma tere me te pōro, te whiwhi piro me te whakawhanaungatanga."

Ā, kāti, he māmā noa te kite atu i te wairua āhuareka o tēnei kapa i runga, i waho hoki i ngā tauārai o te whīra.

Heoi anō rā e ai ki a Irirangi "He tino kaha tō mātau hoatanga me kī. Kāre mātau i te tino whakamā me mātau anō"

Ka tāpirihia a Mānia ōna nei kōrero e mea ana "nā te pai o te wairua ka noho tahi tōku tīma kia whakawhanaungatanga tātau"

E whakahīhī ana te kapa nei i tā rātau noho motuhake i tēnei whakataetae.