Kei te keokeonga a Erin Keremeta-Kapa mō te mahi mau rākau

Aroha Treacher

He tokowhitu anō ngā mātanga mau rakau kātahi nei ka eke ki te taumata o te pouwaru.

O te huhua o ngā tāne e ngākaunui ana ki te mau rākau hei huarahi whai oranga, ko Erin Keremeta-Kapa tētahi o rātou, te wahine tuarua noa kua eke ki te pouwaru.

“He āhuatanga rerekē tēnei ki ahau, i te karanga atu, haere mai koutou ngā pouwaru ka hopu whakaaro ahau, ko au hoki tēnei.  Ka tū whakamā ki te taha o ōku tuākana, tungāne.”

He tekau ngā tau te roa o tōna haerenga, ki te eke ki te taumata o pouwaru.

“He rawe rawa, kua tae ki te tihi o te maunga me kī, engari, he huarahi anō kei te haere, he maunga anō ka piki.”

I tana mahi pouwaru, ka whangaia e ia tōna mātauranga ki te whakatipuranga kei te haere mai nei, kia ora tonu ai te mahi mau rākau.