Kei te hoki kaha a Carlos Hihi ki te papa whawhai o No Gi Brazillian Jiu-Jitsu

Tamati Tiananga

Ka auraki mai te uri nō Te Aitanga a Māhaki me Ngai Tūhoe a Carlos Hihi ki te whawhai No Gi Brazilian Jiu-Jitsu me te manahau, kia eke anō a ia ki te tūranga tuatahi o te motu.

He mahuri totara, tekau tau te pakeke no Te Tairawhiti, ki te ruma noho o te whare whakaharatau ai ia me te aha,  e ū pono ana ia mā te whakaheke tōhau ka ea.

Ko tā Carlos, ko te mea nui ki a ia ko te whakapeto ngoi i roto i āna mahi whakangungu, hei tāna ano māmā noaiho te whawhai, ko te mahi whakaritea i tōna wairua me tōna tinana te mea uaua mōna.

He toa ki ngā momo whawhai maha, kua tahuri atu ki te whakarite i tana tueke.

E ai ki tōna papa he nui ngā ahuatanga whakahirahira kua akongia e tana tama i a ia e whai ana i ēnei mahi.

I a pāpā e aro pū ana ki te whakarite i tana tamaiti ki te whawhai e tiro atu ana a Carlos ki ngā tauira e kaha hiahia ana e ia ki te whai pēra i a Mark Hunt, Cain Velasquez, Jon Jones, rātou ko Anderson Silva.

Ko te mātaki i ngā ahuatanga UFC e whakatenatena ana i te hautipua nei.  

E ai ki a Duane, nā ngā mahi MMA me te mau rakau ki tana marae i Te Waihirere i ngākau paku ai a Carlos.

Ki āna hoa ko tana ingoa karanga ko ‘Loss’, he ingoa hāngai ki te tautōhito Ōpango o mua a Carlos Spencer, he hononga anō tāna ki te Ōpango o mua a Hosea Gear, i tapaina a ia ki te ingoa tuarua a Gear ara ko Emiliano.