Kei te hiahia ngā kaitākaro NRL Māori ki te tākaro ki ngā Whakataetae Māori

James Perry

Ahakoa kāore rātou i whakaae ki a eke ki te papa tākaro, i tae tonu atu ētahi kaitākaro Māori NRL ki te whakataetae Rīki Māori ki Rotorua. E kimi huarahi anō hoki rātou e āhei ai ki te tākaro i te whakataetae nei. 

E tūhono ana a Jazz Tevaga ki te iwi o Ngāti Porou. Ko ia tētahi o te rahinga no te NRL i hoki atu ki Rotorua mō te whakataetae Rīki Māori. I te hāpai ai i ōna tino hoa i te kapa o Kotahitanga.

Hei tāna he pārekareka ki a rātou ki a hoki atu ki te whakataetae hei hāpai i te kaupapa. Whakakī pātara wai, kohi rāpihi rānei kāore he aha ki a ia, ko te mea e hāpai ana i te kaupapa.

Ko Tevaga, rātou ko Charnze Nikoll-Klokstad me James Bell ētahi o ngā kaitākaro o te kapa Warriors i te hāpai i te kapa Kotahitanga. Ko Charlie Gubb, ko Manaia Cherrington anō hoki ētahi o ngā kaitākaro i whai wāhi ki te papa tākaro. Hei tā Willie Stowers, he mea pai mō te kapa kua piri anō ngā tangata o te NRL, kaua mō te kapa anake engari mō te whakataetae katoa.

Nā te āhuatanga o ngā kirimana NRL, me te tūpono ka whara te tinana tē tāea e Tevaga mā ki te tākaro ki te whakataetae nei. Ā ko te hiahia kia kimi āheinga hei ngā tau e heke mai nei. Hei tā John Devonshire, heamana o New Zealand Māori Rugby League, ka whakamana te whakataetae i te whakakanohitanga o ngā kaitākaro nei. Heoi, e pōuri ana ia i te korenga o rātou ki te papa tākaro, e whakanui ai i ngā hapū, iwi, whānau.

E wawata ana a Tevaga ka wahi huarahi te NRL, NZRL rānei e āhei ai ia ki te tākaro anō. Hei tāna, he whakataetae i Ahitereiria mō te Iwi Moemoea kua whakaaetia e te NRL, ā inā hoki ngā kaitākaro NRL Iwi Moemoea e tākaro ana. Ki te pērā i kōnei, e pai ai rātou ki te tākaro ka harikoa katoa rātou.

Hei tā Stowers, ki te kore e āhei ki te tākaro, mā te aha i te hāpai noa e whai mana ai te whakataetae nei e ngā kaitākaro NRL.

Ahakoa i hinga rātou i te whiringa toa ki a Raukawa ki Runga, ko te mea nui mō te kapa e āhei ana ngā hoa ki te noho i roto i te kotahitanga.