Kaupapa: Basketball

Kei runga noa atu a Steven Adams i ngā tohu hākinakina o Te Whanganui a Tara

  • Te Whanganui-ā-Tara

Kua puta whakaihuwaka a Steven Adams i te po tuku taonga hākinakina i Te Whanganui a Tara, ā i hinga i a ia a Conrad Smith raua ko Irene Van Dyke. He tata ki te rima rau tāngata i tae atu ki te taiwhanga o TSB i Te Whanganui a Tara inapō, ā i aronuitia a Adams e te marea i te roanga o te pō.

Kua waia kē ia ki te whai i ngā kuru-rua i te papa tākaro poitūkohu, ā inapō rā i pūmau tonu a Steven Adams ki taua tūāhua, ka whiwhi, kaua i te tohu kotahi noa, engari he tohu e rua kē, hei whakamihi i tana mahutatanga mārika i te ao NBA.

Kua hoki mai te toki nei, e rua tekau tau te pakeke, ki te wā kāinga mō te wā poto, ā hei te wiki e tu mai nei hoki atu ai ki tōna kapa Oklahoma City Thunder, ā, e noho whakaiti ana ia i enei honore nui.

Ka rere ngā mihi a Adams ki tōna whanau, tae atu ki a Blossom Cameron, me tōna kaiārahi pūmau, a Kenny McFadden, tērā i whakahōnoretia hei Tautōhito Hākinakina o Te Whanganui a Tara.

Māringanui ana a Adams kua angitū ia i te ao poitūkohu, heoi, ki te tō te rā ki taua whai, he ara anō hei whai māna.

Ko tāna, “ko te mahi pāmu he pai tērā mahi ki a hau, kua kitea au te ahua o aua mahi ka tāea au te hoki ki te mahi pērā.”