Kaupapa: Rugby

Kātahi te wero nui kei te aroaro o te kapa Ōpango

Tamati Tiananga

Kua ora mārika te kai urungi i te kapa Ōpango, a Richie McCaw i te wharanga ki tōna pona, ā, kua wātea ki te tākaro i tana tukinga kotahi rau rua tekau mā Aotearoa, ka tuki ana rātou ki te kapa Springboks i te Tonga o Awherika. 

Ko tā te poutaha Māori, ko ta Liam Messam, e whakamānawatia ana te aurakitanga o te kai-toutou i te ahi o te tira Ōpango, me te aha, kātahi nā te wero nui o te tau, kei tō rātou aroaro.

Ka hoki atu a Richie McCaw ki te mau i te pōraka nama whitu.

Kua whakaingoatia a McCaw ki te kapa whakaeke, kua tohua a Sam Cane ki te paehihiri, āpiti atu ki ngā poumua, kotahi anake te panonitanga, kua tohua a Charlie Faumuina hei poumua i te mahuetanga ake o Owen Franks.

Koinei te tukinga whakamutunga a te kapa Ōpango i te tauwhāinga Investec Rugby Championship, e whai ake nei ko te tira ka tuki atu ki a Awherika ki te Tonga, ā, toko ono he uri Māori. 

Hei tā te kaiako matua anō, tā Hansen, ko te tukinga ki te kapa Springboks i te papa tākaro o Ellis he wero nui mā te kapa, ā, e rikarika ana ngā kaitākaro mō te tukinga e kainamu mai nei.    

Heoi kāre he paku aha ki te kapa Springbook, kua wātea a McCaw ki te tākaro mā Aotearoa mō te tukinga hei ēnei rangi okioki ki te tāone o Johannesburg.