Kaupapa: Rugby

Kāore a Benji mō te hoki atu ki te kapa Blues

  • Tāmaki Makaurau

I kōrero a Benji mō ngā painga o tāna noho atu ki te kapa Blues, hēoi, e tukuna ai ia i ana here ā-kirimana, i mate ia ki te whāki ake, kāore ia i eke i te hākinakina whutupōro.

Ko tāna ki a Tā John, otirā ki tōna kaiako o mua inaianei, me he kaitākaro rīki kotahi ia i te whīra, i te taha o ōna hoa tākaro whutupōro tekau mā whā.

Ko tā Benji anō, kāore ia i te mōhio pū ki ētahi whakawhitinga kōrero ki ngā karapu NRL i tēnei wā, ā, kāore hoki ia i te pīrangi mōhio kia tatū rā anō tana wehenga atu i te kapa.

I rāhuitia te kōrero e pā ana ki a Benji i te huihuinga pāpāho o te kapa Blues, hēoi, ahakoa tērā i mea mai te poutoko tautōhito a Piri Weepu, kua pāpouri ngā kaitākaro i tenei take, he momo whakawai i te kapa e ahu atu nei ki ta ratou tukinga nui ki te kapa Waratahs hei te Rāmere nei.

Hei tā Piri Weepu, i te wehenga atu a Benji, kōia anake te nanakia Māori ka mahue mai ki te kapa.

Hei tāna anō, he mea whakawai hoki tēnei take i te kapa.

He nui whakaharahara tēnei tukinga ki ngā Waratahs hei te Rāmere, engari ko ngā urupounamu, ka eke rānei te taumata tākaro a Ngā Blues ka tahi, ka rua, ka raru Ngā Blues i tēnei take o Benji.

Tērā tērā, he āwangawanga anō tā Piri mō tōna hauora i te marama kua hori engari kua ora pai ia inaianei, kua tohua ia ki te pae hihiri.

Nā te wharanga o Chris Noakes, kua tohua a Simon Hickey hei topatahi o te kapa, ā, kua whai wāhi te uri o Ngāti Kahungunu a Ihaia West ki te pae hihiri, me te manako ka tākaro ia i tana tukinga Super 15 tuatahi.

He nui hoki ngā mahi kāinga mā Ihaia, kia akona ai te rautaki a te kapa nā te mea nō te Rāhina i tērā wiki noa ia i uru atu ai ki te kapa.

Engari mā te wikitōria anake e whakatika ai tēnei waka totohu.

He nui ngā tāngata e kī ana, ka ahu atu a benji ki te kapa Cronulla Sharks, heoi, tāria te wā e kite ai.