Kaupapa: Waka Ama

Ka whākina ngā rautaki angitū e ngā toa waka ama ā-motu

  • Waikato/Te Waiariki

I whakakotahi ngā kaihoe takitahi toa o Aotearoa ki Karāpiro kia kitea ko wai o rātou ka tū rangatira ki te Whakataetae Waka Ama ā-motu i tēnei tau. Neke atu i te kotahi rau ngā reihi, ā, nā te kohu me ngā otaota o te roto i tōmuri ai te tīmatanga o te rangi tuawhā.

Kei te maha ngā reihi, kei te rawe hoki ngā whakataetae.  I tēnei rangi i kōrero atu a Te Kāea ki ētahi o ngā toa o tērā tau me ngā tau kua hori kia mōhio ai he aha te mahere rautaki hei eke i tēnei taumata.

E ono ngā mētara koura W1 kua kapo i a Tupu, e rua karapīpiti ana taitara Open Men engari hei ko tāna, he tino whakataetae e haere ake ana i tēnei tau.

Ko Māori anō tērā e tiaki ana i tana taitara J19.  E whā āna mētara koura i te wāhanga J16, J19 anō hoki.  

Heoi kua rongo ia i te taumaha o te noho whakaihuwaka.

Mā ngā taumahatanga e pakari ai te tangata, ā, e rima ngā taitara o Vesna Radonich.  

Ahakoa rā tōna turi, me tana whakawhānau pēpi, kua hoki mai ia ki te hāputa o te riri.

E hoe ana a Vesna i te wāhanga Masters, ā, ahakoa tana whakatā i ngā tau tata nei e mārama tonu ana ia ki te mahere hei whai e hoki anō ai ia ki te taumata.