Ngā kaupapa: Rugby League, NRL

Ka whakanui te NRL i te tīmatanga o te tau tākaro rua mano ngahuru mā rima

Tamati Tiananga
  • Tāmaki Makaurau

Hei te pō nei ka whakamānu i te tau tākaro NRL ki te Hēti ki Queens Wharf, Tāmaki Makaurau.

He pō whakatōpū i ngā kaiako, mahuri tōtara i ia kapa NRL hei whakatairanga i te tau tākaro rua mano ngahuru mā rima.

I hui atu ētehi māngai o te kapa Newcastle Knight ki Te Whanganui ā Tara mō te kaupapa Tamaiti Whāngai me WelTec.  Ko te ito o te wānanga nei  he whanake i te hunga tākaro ki ngā āhuatanga o te mātauranga. 

Tupu te toi, whanake te toi, te toi i ahu mai i ngā hautipua o Rīki NRL.  He kaupapa nā te toki Kiwi o-mua a David Lomax, kaitākaro Knights o-mua i tautoko.

Ko te hōhonutanga o te akoranga nei he hāpai ake i ngā kaitākaro kia eke ki taumata kē atu.  

Ka mutu, i hui ngā tino o te hākinakina rīki o Aotearoa nei ki te tohu i ōna tuatangata inapō.  Kia kite ake tātou ko wai mā i hua, ko wai mā i toa.

Ko wai atu i a Simon Mannering, i whakahōnoretia ki te tohu matua o rīki Aotearoa mō te rua mano ngahuru mā whā.

He tau mīharo mō te pouhere nei o te kapa Warriors.  I eke ki tōna tākaro rua rau i te taumata NRL, kotahi rau tākaro hei kaiurungi i te kapa Warriors.  

Nō Atawhai Tupaea te maringanui i kapo ake i te tohu kairangi wahine o te tau. 

Tāpiri atu i eke te poumua o te kapa North Queensland Cowboys a Jason Taumalolo ki te tohu kairangi a ao o te tau.

Kei ngā ringa whero, kei ngā whakaihu waka o Rīki Aotearoa, mō koutou i puta i ngā hōnore o te pō, mōkori anō ngā mihi.