Kaupapa: Fitness

Ka whakanui a Hakinakina Champions i ō rātou whiwhinga

Dean Nathan
  • Te Tai Tokerau

E rua tau nō te orokohanga mai o Te Kura Whakawai i ngā Toa Hākinakina ki Whangarei, ka tū te pō tohu taonga tuatahi hai whakanui i ngā mahi hākinakina a ngā tauira.

He whakaekenga miharo mō ngā toa. Ko ngā kōtiro i taetae mai mā runga waka pāhautea ko ngā tama mā runga motopaika Harley Davidson nō taua rohe.

E ai ki a Marcelle Kaipo, e hiahia ana rātou kia eke ki taumata kē me te whakakanohi anō i a Aotearoa. Tokotoru o rātou kua whai karahipi, ā, kua tūwhera te ao ki rātou. Mā te mahi ka eke noa.

Ki tā tētahi o ngā tauira tuatahi o mua a Jade Stewart, mā ō ake pūkenga e eke ēngari tāpiri atu ko te whakapau werawera me te ū ki te kaupapa ka eke noa atu.

Kua whai karahipi whutupaoro a Jade Stewart ki te kāreti o Saint Kentigerns, he pērā anō te whiwhinga mō Tama Anderson ki Mount Albert Grammar. 

Nā, kua tohu rāua hei kairangi tuatahi mō te kaupapa.

E mea ana a Jade ki te minenga, e hiahia ana ia ki te tuku mihi ki a Marcelle me Hākinakina mō ā rāua awhina kia tūtuki pai i ōna whainga, kia tūwhera hoki i ōna karu kia kite ai mā te whakapau werawera ka taea ngā whainga katoa.

He momoho e meatia ana kua hua ake i te waihangatanga o te taiao e pakari ake ai te hinengaro kia piki ake ki taumata kē, me te mea, kua oti katoa i runga i te aroha.

Ki tā Kaipo, e mōhia ana rātou he uaua te mahi ēngari ka tautoko tonu rātou i a rātou anō, ā, ko tō rātou whai ko ngā taumata tiketike. I mea mai ētahi e waru ngā tau e hiahia ana kia haere ki te whare wānanga. Mā mātou te ara e whakaatu.

E toru tekau mā whitu ngā pia i tēnei wā kua whai tūranga rātou katoa ki ngā kapa o te rohe mō ngā tākaro e rua.

Ko te painga atu kia whiwhi kaiako ngaio.  Mō ngā mahi akonga i toro atu mātou ki a Youtube, ā, ka whai hua nui.  He pai ki a mātou kia whiwhi pūtea anō ēngari mā te manawanui ka takitoru tērā, e mea ana a Kaipo.

Taihoa ake nei ko te ara tēnei e hua ake ai ngā rangatira o āpōpō.