Kaupapa: Rugby League

Ka whakamomori ngā whetu o āpōpō i te whakataetae rīki mā ngā kura tuarua o te motu

  • Tāmaki Makaurau

Koinei te rā tuarua o te whakataetae rīki mā ngā kura tuarua o te motu. Ka tū ki te taiwhanga o Bruce Pulman ki Papakura, Tāmaki Makaurau.

He hanumitanga i ngā kura e rua tekau mā whā huri noa te motu.

Koinei te tau tuatahi i rongo ai te kapa o Manukura ki te mura o te ahi, ki te reanga rīki tuatahi mō ngā kura tuarua o te motu.

E ai ki a Kalani Pewhairangi-Charlie, “Ko te mea nui ki a mātou, he kimi i te mana, he mana ki konei.”

Koinei te karamatamata o te umu pokapoka rīki mā ngā kura tuarua o te motu. Kua whakarauika mai te tini ngerongero kia tutuki ai i a rātou, ngā moehewa rīki kahurangi.  Ka mutu, e hara tēnei tauwhainga mō te manawakiore.

Hei tā Taumutu Nohotima, “Kia kitea ai, kia whakaatu ai tō īngoa i runga i te papa rā, i te whīra rā.”

Ki tā Pewhairangi-Charlie, “Te nuinga o aku hoa e mea ana, kei runga mātou, ka toa mātou i o mātou kemu. Kātahi ka tae mai ki te pōhiri, ka kite i te rahi o ngā tama, oh he whakaaro anō kei reira.”

Hei tā ngā kaiwhakahaere, ina te pai o tēnei papa kia kitea ai te whānui o ngā pūmanawa Māori e ngā purahorua o te NRL.

Ā, he kapa anō tēnā e takahia ana te pae kouka, ko Te Kura Tuarua o Taoroa nō Whakatane, i haukerekeretia Te Kura o Hemi Kuki o Tāmaki ki te taha i te rā nei

E ai ki a Te Kawe Ratu, “Tēnei te tau tuatahi mō rātou me kī, kāre te nuinga o rātou kia tākaro i tēnei kemu, he mea hou kia rātou, ētahi kua mārama, engari te nuinga kāre e aro atu ki tēnā kaupapa.”

Ko Pewhairangi-Charlie tēnā kei te tau tuarua o tana kirimana takaro e toru tau te roa mo te kapa Penrith Panthers, e ngana ana kia whakairongia tana īngoa ki te pane o mahara, pēnā anō ki ngā kaitakaro huri noa.

Hei tā Kalani Pewhairangi-Charlie, “Ehara au i te Dean Whare tuarua, ko au te Kalani tuatahi, yeah, kao, kare au e mōhio e pā ana ki taua Dean Whare.”

Hei āpōpō tū ai ngā kemu whiringa mutunga, katahi ka whakamomori ngā whetu o āpōpō kia tuhia o rātou īngoa ki runga, ki ngā whiringa toa hei te Rāpare.