Ka whakaīngoahia te tira Ōpango Māori mō te tukinga whakamātautau ki Hapāna

Kātahi anō ka whakaīngoahia te tira Ōpango Māori mō te tukinga whakamātautau tuarua ki te kapa o Hapāna ki Tokyo hei te Rāhoroi.

He rahi ngā rerekētanga i o te kapa o te whakamātautau tuatahi.

Nā te hokinga mai o Ash Dixon ki te kāinga, kua tohua a Cody Taylor ki te ope whakaeke, ki te taha o Dan Pryor me Kurt Baker, ka tū ki te paehau mō tana tākaro tuatahi o te haerenga nei.

Ā, tokotoru anō ngā kaitākaro ka kōkuhu atu mai i te pae hirihiri, ko Brendon Edmonds, ko Mitch Crosswell me Joe Webber.

Nā te whānui o ngā pukenga o ngā kaitākaro katoa i te kapa, he nui hoki te whakapono o ngā kaiako ki ngā hononga katoa ka tohua e rātou.

Ahakoa e whakaomahia ana te katoa, ko te tū rite o ngā tautōhito me ngā tauhou e tau ana. 

Heoi ka rerekē ake te whakamātautau e haere ake nei, ka uaua ake.

Kua mārama te kapa o Hapāna ki a rātou hapa i te tukinga tuatahi, ā, ka kore e hiahia ā-muri e hokia.

Ko te kaitākaro nei, a Karne Hesketh nō Ngāti Kahungunu, koia hoki te parirau o te kapa Hapāna.  Kua eke ia ki tāna whakamātautau tuatahi me te papa-oro-tanga ki te kapa Ōpango Māori i te Rāhoroi kua hori.

Ā, whai muri i te whā tau i te tākaro mō te karapu o Sanix ki Fukuoka, i rongo mārika ai a Karne i te piere nuku o tēnei taumata tākaro.

I tākaro a Karne mō Ōtākau i mua i tana nekenga ki Hapāna i te tau rua mano kotahi tekau.  Hei tāna, e ora pai ana tōna whānau ki Fukuoka.

Heoi ko te aronga i tēnei wiki mā Karne me te kapa o Hapāna kia whakatikaina ngā hapa o te whakamātautau tuatahi.

E kaikā nui ana a Karne kia tūtaki anō ki te kapa Ōpango Māori me te whakanui ake i ana whakamātautau.