Ka whai rongonui tētahi uri Māori i te Arnold Classic

Tamati Tiananga

He uri nō Ngāpuhi, Ngāti Whātua ki Kaipara me Ngāti Porou kua eke tuarua i te wāhanga pākaua o te tauwhāinga whakawhena uaua o te Arnold Classic i tēnei tau. Ko Sam Andrews tōna ingoa, ā, nō tērā tau uru atu ai ia ki tōna whakataetae tuatahi i te huinga NZIFBB.

Kua tohua ko ia te toki tuarua pākaua o te tauwhāinga whakawhena uaua o te Arnold Classic mō te tau nei.

He kotahi rau whā tekau ngā kaiuru nō ngā tōpito katoa o te ao, ā, tērā te āwangawanga nui o Andrews nā tōna ihuhūpē e kore pea ia e eke panuku, e eke Tangaroa.   

Ko te tauwhāinga whakawhena uaua Arnold Classic nei tōna whakataetae tuatoru noa iho nei, me te mea anō hoki, i eke tuatahi a ia i te whakataetae ā-rohe o Te Whanganui ā Tara, ā, ka kapi ake rā ia ki te tūranga tuawhā i te tauwhāinga matua o te motu. Nā ōna whakahirahiratanga i tonoa ia hei māngai mō Aotearoa ki te huinga matua i tū ki Ohio, Āmerika. 

He mana ārai tana mahi i te tāunga waka rererangi o Te Whanganui ā Tara, nā ngā kōrero akiaki o te pūkenga whakawhena uaua NZIFBB nei, a Darryn Onekawa i tērā tau, i tipu te hiahia kia huri atu ai ki te hākinakina nei.

Hei te Hereturikōkā e haere ake nei uru atu anō ai ia ki te tauwhāinga matua o te motu, me tana aronga nui kia whakaatuhia ngā pūkenga i ako i a ia i te Arnold Classic i ngā rā tata nei kua pahika.