Ka whai rānei a Wikeepa i te reanga ngaio mō te mekemeke?

Tamati Tiananga
  • Waikato/Te Waiariki

I te huinga mekemeke kohi moni i tū ki te pāpara o G2 i Tauranga i ngā rangi tata nei, i papatū te toa takiwhitu wahine, mema o te kapa pā whutupōro o te motu, mema ō-mua hoki o te kapa Kiwi Ferns a Rachel Wikeepa i tāna whawhai ki a Jade Tapsell.

Nā tōna angitū, kua tahuri te hautipua hākinakina nei ki te whakaaro ake kia kake ki te reanga ngaio o te hākinakina mekemeke.

Ehara a Rachel Wikeepa i te tauhōu ki ngā angitū o te ao hākinakina me te aha, kāre ia i ohorere i tana wikitōria ki runga ake i a Jade Tapsell i tā rāua whawhai mekemeke i Tauranga ina tata nei. 

Kua roa a Rachel e eke atu ana ki te keokeotanga o te hākinakina ki ngā kapa ā-rohe, kapa ā-motu hoki i te poitarawhiti, kaiaka, rīki, whutupōro takiwhitu me te pā pāoro.

Whai mai i tāna whakapeto ngoi, whakaporotū whirikoka i te papa rīngi, i tipu te hiahia ki a whai atu a ia i te tākaro nei hei tikitiki mō tōna māhunga.

Ka mīharo te hunga i tae atu ki te huinga kohi pūtea G2 te mātaki i te mareikura, me te manako nui ka puta a ia hei kaiwhawhai ngaio, hei tā Rachel, he whakaaro noa i te wā nei.

Engari mō nāianei, e koke whakamua ana a ia me te wawata, ka puta anō a ia ki te mura o te ahi mekemeke.