Ka whai piro a Maitland mō Kotirana

Ahakoa i whai piro ai te kaitakaro tawhito o te kapa Crusaders a Sean Maitland i tōna kēmu tuatahi mō Kotirana, tē taea tana kapa te eke panuku ki te kapa o Ingarangi i Twickenham he 38 - 18 i te whakataetae whutupōro nui o Uropi RBS.

I te pironga o te parirau o Ingarangi a Chris Ashton i te pito whakamutunga o te haurua tuatahi he 19 - 11, i mōhio pai rātou ka noho pūmau rātou ki mua.

Ko ngā kōkuhunga a Billy Twelvetrees, Geoff Parling rātou ko Danny Care i kapo hoki i ētahi piro, tēnei whai muri i te tākaro mumura o Owen Farrell i te kaponga o ngā piro 16 me tōna pūtu. 

Hei tā te kaiako o Ingarangi a Stuwart Lancaster "e harikoa katoa ana ia me ngā piro i runga i te papa kaute, ā e kama ana ia kei te noho pūmau āna kaitākaro i runga i te taumata tiketike."

I noho te kapa Kotimana ki te tūranga tuarua mō te nuinga o ngā wāhanga o te kēmu me ngā piro o Maitland, ā, nā Stuart Hogg te kemu i whakamutu.

Kairīpoata:  Wepiha Te Kanawa