Ka tuki te kapa U18 o Aotearoa ki ngā hoariri o Ahitereiria

Dean Nathan

Kātahi te pakanga nui ki Whangarei inapō ko te whakamātautau tuatahi a ngā taitama kiwi kei raro i te tekau mā waru tau te pakeke ki ngā taitama nō ngā kura o Ahitereiria.

Puta ana ngā ihu o ia kapa i te tukinga, heoi, i te mutunga iho, nā te tautoko a te hunga mātakitaki o te kāinga, i rongo ai ngā taitama Kiwi i te wikitōria.

I kawea te wairua o te haka ki roto i tēnei tukinga.  Tuki atu tuki mai, ka riro i ngā kiwi te toto tuatahi, engari e marama mai ana ko te koi o te hoariri.  Kīhai i roa kua whiti anō rātou i te rārangi.  Kātahi ka whakautungia e ngā kiwi kia peka ai ki tua i te wā haurua. 

Ki te wehenga tuarua ka paku ngā pū a Ahitereira, anō nei ko te haukerekeretanga tēnei o ngā pipi kiwi.  

Mai rā anō he kapa rongonui tēnei i poipoitia ai ngā tino toki o Ahitereiria, ā, nō ngā tau tata nei kātahi anō ngā kiwi ka pātata atu ki a rātou.  Engari i rere ngā kiwi i tēnei pō e kore hoki e taea te puritia e te hoariri.

Hei te Rāhoroi te tuarua o ngā whakamātautau a ēnei kapa ki Ōtāhuhu.