Ka tuki ngā Falcons o Akarana ki ngā Pūru o Ōtautahi

Rahia Timutimu
  • Tāmaki Makaurau
  • Te Waipounamu

Kei waho atu te kapa pūru o Ōtautahi i te whakataetae rīki ā-motu, whai muri i tā rātou hinganga karapīpiti tuarua.  Ahakoa te aranga ake o te kapa nō Te Waipounamu i te haurua tuarua o te tukinga ki te kapa Akarana Falcons, i turakina rātou, e whā tekau mā waru ki te rua tekau, kia toa kē, ko ngā kaipupuri i te taitara toa. 

Nā tēnei ka whakataetae atu a Akarana ki ngā Whai o Manukau Manukau i te whiringa toa o tēnei whakataetae ka tū hei tērā marama.

I tere a Tāmaki Makaurau ki te tīmata i te tukinga, e rua ngā wā i whakawhiti i te rārangi piro i ngā mēneti tekau mā rua.

Ā, kāre i roa ka pērā tonu te taumata tākaro, he kaitākaro i waho kia whai piro ki te kokonga maui, kia tekau mā ono ki te kore ngā tatau.

Tahi rau tekau mā whā ngā rutu i tutuki i ngā Pūru o Ōtautahi, me te whakaatu i te taha ārai tonu rātou mō te nuinga o te tukinga.

Engari anō i te mēneti toru tekau, i eke tuatahi ai te manuhiri kia riro ai tā rātou piro tuatahi o te tukinga.

Ka whakaatuhia e Tāmaki Makaurau te take i tū toa ai rātou i tēnei whakataetae, rua tekau ki te whā ngā tatau i te wehenga rua.

I tere anō a Tāmaki ki te eke anō ki te papa tātai i te mēneti tuatahi o te haurua tuarua.

Heoi i hoki mai a Ōtautahi, me te whakawhiti i te rārangi piro e toru ngā wā kia whai a Tāmaki mā ngā piro e ono noa.

Engari, kāre i roa ko Tāmaki tērā i whakawhiti anō i te rārangi piro me te whai i ngā piro karapīpiti rua tekau mā rua, kia wikitōria te tukinga, whā tekau mā waru ki te rua tekau.