Ka tū te pō tohu tākaro Riki o Aotearoa

Tamati Tiananga

Hei te pō nei ka tū te pō tohu tākaro Riki o Aotearoa ki te wharau wahapū o Tāmaki Makaurau. He pō whakatairanga i ngā mahuri tōtara, tauhou, wahine toa me ngā kaiwhakahaere hoki o te tau.

He wiki nui e haere ake nei mō te hapori rīki. Hei te pō nei ko te tohu tākaro o Riki Aoteraroa mō te rua mano ngahuru mā whā, hei āpōpō tokorua ngā tino ihorei a Greg Inglis rāua ko Shaun Johnson ka whakamānu i te tau tākaro NRL ka mutu.

He ngāwari ngā kupu akiaki a te kaipupuri i te tohu golden boot, a Shaun Johnson. Hei tāna ko te whāinga he whakanui, he whakaawe i te hunga hiakai i te ao rīki

He tau mīharo te tau rua mano ngahuru mā whā, i eke te kapa Kiwi i te tauwhāinga Four Nations.

Ka whakanui te kapa Warriors i to rātou huritau rua tekau tau i te NRL, otira e mātai whakamua ana te whakaaro ki te whakataetae taki Iwa NRL hei ēnei rangi whakatā

Noho tonu ki te tauwhāinga Nines, kua puta te kōrero i a Andrew McFadden, kaiako i te kapa Warriors, tokowhā ngā kaitākaro kua puta i te tira, ko tētehi o rātou ko te kaiurungi i te kapa Kiwi, Warriors hoki a Simon Mannering ko te wharanga te take, he rua tekau mā rua ngā kaitakaro i tohua, ko tētehi ko te kaitākaro i te kapa Māori a Bodene Thompson.