Ka tū mai ko tētahi taiopenga mekemeke wāhine ki Kawerau

Mere McLean

Ko te mana o te wahine te kaupapa matua i tēnei pō ki te whare whakaruruhau o Ron Handley ki Kawerau, ā, ko te mekemeke te kaupapa nui e whakarauika ana i te tini tangata.

E ai ki a Naomi Herewini, o Te Whānau a Apanui e mea nei, “He wāhine nō roto o te hāpori o kōnei o Kawerau, otirā, ko ēnei wahine ka noho ki raro i te karapū mekemeke nei o Kawerau.”

Kua tata ki te rua tau tēnei kaupapa e whakaritehia ana e Warwick Godfey, ko ia hoki ko te kaiwhakaako mekemeke o Kawerau, ā, mō ētahi o ngā kaimekemeke he tuatahitanga tēnei kia tū ki roto i te papa mekemeke.

Hei tā Davina Thompson o Ngāti Rangitihi, “He nui ngā momo hākinakina kua oti kē i a au, engari, he mahi tino nui, whakapau i te werawera anō hoki tēnā”

Ka mutu, ko tā te uri o Tūwharetoa, tā Zhantellie Te Riini e mea ana, “Me mate ururoa te tangata, kei mate wheke. I tōna tuatahi, he āhuatanga weriweri, anuanu anō hoki, ka mutu, he mea whakakoakoa i te tangata”

Kua haere atu hoki tēnei hunga mai i Ōpōtiki, ā, ko te tautoko i te kaupapa me tō rātou kaimekemeke te whainga nui mō rātou.

Ko tā Anameka Pirini, o Te Whakatōhea e kii ake nei, “Patupatu te manawa, me te harikoa, kua ea tērā mahi, engari kei te tino harikoa ki tōna kaha, e tū pakari, e tū kaha.”

Tekau mā whā ngā kaimekemeke he wāhine katoa rātou, tokowhitu ngā whawhai kua whakaritea, ā, ko te mutunga mai ko te tū whakahīhī a Kawerau.