Ka timata te whai wāhi pupuhi pārera hei te Rāhoroi

Mere McLean

E koropupū ana te koa mō te marea e kaingākau ana ki ngā mahi puhipuhi parera ka tūwhera hei tēnei Rāhoroi, hēoi ko tā ngā āpiha e whakatupato ana i te hunga whānui ki ngā tikanga o te kaitiaki, ko te korero matua mai ngā kaipupuhi o te rohe o Whakatāne, kia mataara te hunga mau pū i tēnei wāhanga o te puhipuhi parera.

Kei te whatumanawa te wāhanga puhipuhi parera ki te hunga whai i tēnei momo mahi ia te wa tū ai te wāhanga nei, engari ko te kōrero matua mō koutou e aru ana ki tēnei mahi a te Rāhoroi, kia mataara.

Hei tā Joseph Pryor, he uri nō Ngāti Awa me Tūhoe e mea nei, “I ngā wā o mua i te wā i tipu mai au i taku kainga, i reira ōku mātua tohutohu i ahau i tēnei mahi te puhipuhi pare, tuatahi, kāre rātou e hari waipiro ki roto”

Ko te waipiro me ngā tikanga e pā ana ki te pū ētahi o ngā tirohanga nui i tēnei wahanga o te puhipuhi parera.  Ka timata te wahanga nei hei te tekau mā rima miniti hipa atu i te ono karaka i te ata o te Rāhoroi, mō tēnei mātanga o te tari aruaru kararehe ki Whakatāne me aro ki ngā whakatūpatotanga, engari kia mau ki te wairua hakoakoa.

E ai ki te māngai mō ngā take aruaru kararehe me te hī ika o te rohe o Whakatāne, ki a Steve Bloor, “Kia pai te haere, ā, kia tika hoki te haere. Kāua e tuku mā te mahi rorirori koe e kawe. I roto i ngā tau puhipuhi kua hipa, kāre i te nui ngā hapa i roto i tēnei mahi”

He maha tonu ngā aituā kua puta i ngā wā ō mua nā runga i tēnei mahi, hēoi, nō te tau rua mano mā iwa i mate ai tētahi nō te rohe o Te Matau a Māui i te wā o te puhipuhi parera.  Mō tēnei uri kaiaru o Ngāti Awa me Tūhoe ko te wawata kia kāua e tū anō tērā āhua i tēnei tau.

Ko tā Pryor anō rā, “Me tūpato koe, kei hea tō pū e titiro mai, mehemea ki waho ki roto o te whare, me huakina tō pū, kia kite ake koe i tō pū, kāre he kariri o roto.”

Nuku atu i te toru tekau mano ngā raihana puhipuhi parera ka tūkuna i tēnei wiki tonu, me te tirohanga mō tēnei Rāhoroi, he pāhū nui kei te haere.