Kaupapa: Rugby League

Ka tautokotia te kapa Kiwi e te hau kāinga o Whangarei

Tamati Tiananga
  • Te Tai Tokerau

Ahakoa te ua marangai me ngā wharanga kei waenganui i ngā Kiwi, ka tautokotia tonutia te kapa e te hau kāinga o Whangarei, e matapaetia ana ka whakakī atu i te taiwhanga o Toll hei te Rāhoroi.

Ko te kōrero kua tau mai ki a Te Kaea, kō atu i te whitu mano tīkiti kua hokona atu, ka mutu, ko te manahau o te poari rīki o Aotearoa, ka whakarauika atu te tini me te mano o te hunga taunaki.

He whakaariki te haere ake mā te kapa Kiwi.

Ko te toki a Mose Masoe kei te ihu o te kawau māro o Hāmoa me te hiakai o rātou kia whai wikitoria tuatahi ki te whakataetae Four Nations.

Mārakerake te kitea kaore a Dean Whare i te whakaharatau i te rangi nei, engari mo te manahau a ngā kaitakaro ka piki tōna ora i te wharanga o tōna tapatapa.

He tekau mā rima mano tāngata neke atu ka āhei te uru ki te taiwhanga o Toll, e ai ki te kōrero nō ngā tōpito e whā o te Taitokerau te hunga tae atu.

E ai ki ngā matapae huarere he ua marangai anō te āhua hei ngā rangi e heke mai nei, ko ta Vatuvei me kaua rātou e wehi atu ki ngā whana teitei o te uri nā Ngāti Tuwharetoa, a Kyle Stanley.  

He te ahiahi nei tutaki tuatahi ai ngā kapa e rua nei, ki te huinga mihimihi o te koromatua o Whangarei. Heoi hei ēnei rangi okioki, me matāra, he pakanga nui kei te haere ake.