Kaupapa: Netball

Ka takitahi ngā whetū mō te Kapa Stars

Ruth Smith
  • Tāmaki Makaurau

Ko ngā hua o Hiwa-i-te-rangi i puta ki te kapa Northern Stars i tō rātau wikitōria tuatahi o tēnei whatinga.

I pakanga ngā Stars mō te hemo tonu atu e tutuki ai te wawata, ā, whakapaua katoatia ai te kaha e toa ai i a rātau te hauwhā tuatahi e whitu piro ki mua.

Hoki mai ai te kapa Tactix ki te hauwhā tuarua anō he mate e rānakihia ana, me te aha, i kapi haere te tatauranga piro.  Heoi anō, nā te panonitanga o te uri tāroaroa o Ngāpuhi, o Holly Fowler hai poka pū me te arotahi a te kāpene, a Grace Kara ki ana kaitukituki, i kānapa tonu ai te kapa Stars.

Kitea ai te pakanga o roto i te kapa Tactix i te hāwhe tuarua, i te huhua o ngā haukotinga o ngā kaikaupare, o Temalisi Fakahokotau rāua ko Jane Watson.  Ko Kimiora Poi hoki tērā i manaaki i te poi ki te taha tukituki, me te aha, kapi ana i te kapa Tactix ngā tatauranga ki te piro kotahi i ngā miniti whakamutunga o te tukinga. 

Kati ai te kēmu, ko ngā Stars kai runga, e rima-tekau-mā-ono ki te rima-tekau-mā-toru.  Hai te rauna tuawaru tuki ai rātau ki ngā puru rourou o te whakataetae, ki te kapa Pulse.