Ka rere arorangi atu ngā kaitākaro Spartakiade

Ko te pūtake o Spartakiade he whāngai i ngā mahuri tōtara hākinakina ki ētahi pūkenga, kaua noa ki te rīki, engari hoki hei kawe i a rātou ki te ao. E kaha whakaakona ana te mana nui o te mātauranga me te hiranga mā roto mai i te hakinakina. Ka whakapeto ngoi ngā kaitākaro ā-tinana, ā-hinengaro hoki i ngā whakaharatau, ā, i ngā rangi okioki kua hori i whakatinanahia ngā mahi i tā rātou pakanga atu ki te kapa rīki tekau ma waru tau heke iho o Tonga.

Nō te Whiringa-ā-rangi timata ai ēnei kaitākaro o Spartakiade ki te whakaharatau ngātahi, kia rite ai rātou mō te tau tākaro e tū mai nei.

E ai ki a Steve Roberts, o Te Rarawa e kii nei “he tino pai tā mātou tere i te rārangi ārai, me te reka hoki o ngā kōrero i waenga i ngā kaitākaro, kua tekau mā ono wiki te kapa nei e whakaharatau ana, ā, kua rongo i ngā taimahatanga i ētahi taima”

E toru haora i te rangi, e rima ngā rangi i te wiki ngā pia o Spartakiade e whakangūngū ana i ngā marama e whā kua hori atu rā. Ā, ahakoa ko te rīki te aronga matua, ko te mātauranga me te hiranga ano ētahi tino aronga ā rātou.

Hei tā tēnei uri o Te Rarawa Kaiwhare e mea ana “Ehara i te mea ko te whutupōro te mea nui, e aro kē atu ana ki te oranga o ngā kaitākaro”

I kitea te kounga o ngā kapa o Spartakiade me Tonga i ngā rangi okioki, ā, e hia kē ngā piro i tutuki i ngā taha e rua.

Hei tā Finau Payne, o te kapa o Tonga, “He mea rawe te whakamātautau i ngā poai nei ki te kapa o Spartakiade kia mōhio mai ai mātou he pēhea nei tō mātou pakari ā-tima.”

I te mutunga iho i herea te kēmu, e rua tekau mā ono ki te rua tekau mā ono, engari ko te mahere aronga roa kē mō ngā kaitākaro te whāinga tiketike.

Hēoi, ko te āhua nei kei te takahi kē ēnei mahuri tōtara i te ara o angitū i tēnei wā.