Ka pōhiri a Tāmaki Makaurau i te kaupapa hiki maitai mō ngā motu hoawhenua me Oceania

Aroha Treacher
  • Tāmaki Makaurau
  • Te Tai Rāwhiti

Ki te whakataetae atu koe ki ngā tautohito o te ao, ko te upane kaupane kia whakawhiti te rā te matua o te kēmu.

E hia rau ngā kaihiki maitai toa nō ngā tōpito huri noa i te ao ka tau iho ki Tāmaki Herenga Waka ā tērā marama mō ngā taumāhekeheke hiki maitai o ngā motu hoawhenua me Oceania.

Ki waenganui hoki i taua rahi, kitea ai tētahi tokotoru nō Te Matau a Māui kua tohua ki te tira o Aotearoa, e kaikā ana ki te hiki i te mānuka.

E toru ngā wā kua tohua a Nick Hansen ko te tangata kaha rawa atu o Aotearoa, nā whai anō koia te ika āwhiro o rātou.

E whakapono a Hansen, ka kitea ko ngā 'hiki nui' me ngā 'rekoata nui' i te mea rima rau ngā kaihiki maitai ka uru i te whakataetae mō ngā rā e whā.

E rata ana te tauhou nei a Dimi Hanara (Kahungunu) ki te whakapūioio poho, he rua rau rima tekau kirokaramu tōna tino tutukinga.

Hei tāna he mea mataku te hiki taumahatanga pērā te nui, me mataara te tangata, me māia te tū, me whakapono ki a koe anō.

He rua tekau mā tahi nga tau o Ethan Foote te potiki o te tira, ko tāna nei e whai, ko te hiki he toru rau kirokaramu te taumaha i tōna wā tuatahi i te whakataetae.

Ka tū te whakataetae nei hei te tuawhā ki te tuawaru o Hakihea ki Tāmaki Makaurau.