Ka piki anō rā te whakataetae reti ngaru Māori

Dean Nathan
  • Waikato/Te Waiariki

He kaupapa kua memeha i roto i ngā tau tata nei ko ngā whakataetae reti ngaru Māori o te motu.  Engari nō ngā rā nei i tū ai tēnei tauwhainga ki Mōkau i te rohe o Waikato me te whai a ngā kaiwhakahaere kia whakapiki ake anō tēnei kaupapa whahahirahira ki ngā taumata e tika ana.

He torutoru noa nei ngā ngaru toa i puta i tēnei tau engari kei taumata kē ngā pūkenga i whakaatūhia ai e rātou ki te whakataetae eke ngaru Māori o te motu.

Kāti, hei tā Tanerore Manawaiti-Barbridge, he uri nō Ngāti Maniapoto me Ngāti Te Rangi e mea ana “he pai ki te kite i ngā ngaru toa nō Aotearoa nei me te whanaungatanga te kotahitanga me te kite i ngā wāhi ataahua rawa atu.”

Rangatahi mai, rūhā mai, he tohu pai i tēnei tau ko te tini o te hunga rangatahi e piki ana ki ngā taumata o tēnei hākinakina.

E ai ki te Perehitini o Te Ohu Reti Ngaru o Aotearoa, ki a Peter Martin “He nui rawa atu ngā mahuri tōtara e pihi ake ana i te wao, he pai ki a au nei te mātakitaki i ngā taitamatāne, he tekau tau te pakeke a ētahi, he tekau mā rima te tau a ētahi atu, ā, kua kitea hoki ētahi kōtiro e anga atu ana ki te wāhanga matua o ngā whakataetae. E harikoa katoa ana ahau i tērā āhua”

Hēoi anō rā, hei tā Pete Smith o Ngāti Hangarau me Ngāi Te Rangi “ko te tūmanako kia whakakotahi ai ngā tauira, arā, ngā rangatahi ki roto i te wai kia ako rātou he aha ngā āhuatanga o Tangaroa.”

Ko Kea Smith tētahi o ngā taiohi tokorima nō Tauranga Moana kua tohua ki te kapa taiohi o Aotearoa ka wehe atu ki te kapu o te Ao i te whenua o Ecuador ā ngā wiki e tū mai nei.

Ko tā te uri o Ngāti Ranginui me Ngāi Te Rangi nei e mea nei “he whakataetae nui whakaharahara tēnei taiopenga nei, i runga i te mea, kei te whakakanohi au i a Aotearoa whānui, nāreira e hiamo ana ahau i taua āhuaranga”

Neke atu i te rua tekau tau e haere ana, he tauwhainga tēnei i rongonuihia ai ngā tino ngaru toa o te motu engari ka memeha i ngā tau tata nei anō nā te whakakahoretanga i raro i ngā whakahaere o Surfing NZ.  

Kāti, iaianei kua ara mai anō ki raro ia Aotearoa Māori Surfing Incorporated Society me te karanga ki ngā hau e whā kia tautokotia mai.

He kaupapa rangatira i ngā tau kua pahure kua ara mai anō ki te pae.