Ka pakanga atu te tira poipapa NZ U12 ki ngā hoatākaro o tāwāhi mō te wā tuatahi

Wikitōria Day
  • Tāmaki Makaurau

Hei te pō nei rere atu ai te kapa poipapa mā ngā kaitākaro tekau mā rua tau heke iho o Aotearoa ki Amerika mō te whakataetae World Ripken Series.

Nō nā tata nei tū ai tā rātau whakaharatau whakamutunga i mua i tā rātau wehenga atu, ā, i whai wā a Te Kāea ki te kōrero ki ngā kaitākaro Māori o te kapa, me tō rātau kaiako e poipoi haere ana i a rātau, arā ko Riki Paewai, nō Rangitāne.

Te Whakataetae Ripken World Series. Tētahi o ngā whakataetae poipapa rangatahi nui rawa o te ao mō tēnei reanga, ā, ka kotahi atu ēnei kaitākaro ki reira, mō te wā tuatahi. 

Kua eke a Aotearoa mai i te tūranga kotahi rau tekau mā rima ki te tūranga rua tekau mā whitu i te ao mō te poipapa. Nō reira, e kitea ana e te ao te pitomata o a tātau kaitākaro.

He tuatahitanga mā te nuinga o ēnei tamariki, kia rere tawhiti rawa ai i te kāinga. Heoi, he haerenga e kite ā kanohi ai rātau i te ao. 

He nui rā te tautoko a ngā whānau kia tutuki ai i ēnei kaitākaro ō rātau moehewa poipapa. 

Ahakoa te hua ka puta i te mutunga o te tauwhāinga, me whakahīhī tonu, inā rā, e whakakanohi ana rātau i a Aotearoa ki tāwāhi.