Kaupapa: Rugby

Ka mau anō a Israel Dagg i te poraka a kapa Mākipae

Aroha Treacher
  • Te Tai Rāwhiti

Kua whakawāteahia a Israel Dagg e te kapa Ōpango kia mau anō a ia te poraka mā me te pango o tōna tira ITM Cup, ngā Mākipae o Te Matau a Māui.

I tērā tau i whiwhi ki a rātou te hīra Ranfurly mō te wā tuatahi i ngā tau whā tekau mā whā.  Engari, kāore i pau tētahi wiki i whānakohia te hīra i a rātou e Counties-Manukau.  Engari, hei ēnei rangi okioki ka tāea e rātou te whawhai ki a Counties anō mō taua hīra.

He mea motuhake ki a Israel Dagg te hokinga mai ki tōna kāinga, engari, mā hea atu i te hauhau o Te Matau a Māui e puta ai tōna taha whakakata.

Haunga rā ngā tīhohe, ki tēnei Ōpango tautohito ka tākaro ia i te tūranga haika, he tukinga hiranga rawa ki aia nātemea, kāore anō ia kia wikitoria i te hīra nei.

Kua mōhiotia te topatahi a Ihaia West mō tōna nanakia ki te whawhati i te rārangi ārai, koia tērā i pou whirinaki i tā rātou wikitoria Ranfurly i tērā tau.  Engari, me kāti ngā poumua pērā i a Sherwin Stower, Frank Halai.

He rua tekau mā whā ngā tukinga a Counties mō te hīra Ranfurly engari auare ake, nā reira ko taua wikitoria kotahi, kua tāhia ki ngā pukapuka hītori, me te aha ka ūpoko pakaru rātou kia mau tonu ki te hīra.