Ka hono atu a Steve Rapira ki te kapa Salford a tērā tau tākaro ai

Tamati Tiananga

I tata huri tuara atu te kaitākaro tautōhito rīki nei a Steve Rapira ki tōna ūmanga tākaro, kia hoki atu ki te wā kāinga i Kirikiriroa mahi ai nā runga i ōna wharanga.

No te marama o Paenga Whāwhā tana tākaro whakamutunga, nā te wharanga kino ki tōna pona.  Heoi nā ngā kōrero akiaki o tōna hoa rangatira a Tarati, i aronui ai a Rapira kia whai kirimana tākaro, e rua tau te roa, ki te kapa Salford, i te tauwhāinga Super League i Ingarangi.

Ko te tākaro tōna oranga mai i tōna kōhungahungatanga, heoi tērā ngā wharanga i tino wero i te tinana, kua whakatahahia i a ia, i pono mai te kōrero a Rapira ki au mō ngā taumahatanga i runga i a ia.

Engari nā tana tamaiti a Te Whana rāua ko ngā kōrero o tana hoa rangatira a Tarati i mārama, me whakapeto-ngoi a ia kia whai oranga mō tona whānau, kei te whakaritea he tāngata kia noho ki tōna whare mō te wā e hunuku tahi ai rātou ki te whakatīnana i tōna kirimana tākaro me te kapa hōu nei a Salford Red Devils  hei te tau rua mano tekau mā wha.

He tīmatanga hōu tēnei mō Rapira, arā noa atu ngā tino toki, hoa kaitākaro hōu o te kapa, ko Rangi Chase tērā rātou ko Tony Puletua, ko Junior Sa'u me tōna tino iho pūmanawa a Adrian Morley.

He mea mīharo mō Rapira te hunuku ki Ingarangi, i reira tōna matua e tākaro ana mō te kapa Warrington i ngā tau ki muri nei.

Ā, āpiti atu nō Rapira anō te hōnore nui, nā āna mahi rangatira ki te tautoko i ngā kaupapa whāngai parakuihi ki ngā tamariki i raro i te maru o te karapu Warriors i te hapori, ka riro pea ki a ia te mētara Ken Stephen, hei te mutunga o tēnei marama tū ai te pō whakanui.