Kaupapa: Netball

Ka hoki a Casey Kopua ki te kōti netipōro

updated Rahia Timutimu
  • Tāmaki Makaurau
  • Waikato/Te Waiariki

Ahakoa i whakatā te kapa Mystics i ngā rangi whakatā kua hipa, e ārahi tonu ana rātou i te whakataetae ANZ, heoi ko Waikato Magic tērā e aru ana i a rātou i te tūranga tuarua.

Hei te Rāhina tūtaki ai ēnei kapa, ā, i oti ōrite ai ngā tatauranga i te tūkinga whakamutunga ki waenga i ngā kapa nei, nā reira he pakanga nui kei te haere ake. 

Kotahi anake te whāinga a te kapa Mystics hei tērā Rāhina.

Ki te wikitōria rātou, ka noho tonu ngā Mystics ki te tihi o te tēpu o Aotearoa i te whakataetae Poitarawhiti ANZ.  Ki te hinga, ka noho tonu te kapa Magic ki ngā kapa toa e rua.

Ko te kōrero nui i tēnei wiki, ko te hokinga pea o te kāpene Rarauwhe Hiriwa a Casey Kopua, i pākia e te pona whara i tērā tau.

He raruraru anō kei te kapa Mystics, i heke iho a Laura Langman i te kōtī tākaro i ngā rauna e rua ki muri, ā, ko te whakangā tāna mahi i tērā wiki.

I te tukinga whakamutunga ki waenga i ngā kapa e rua nei i te rauna tuaono, i whai te kapa Mystics i ngā piro karapīpiti e ono i te hauwhā whakamutunga kia noho ōrite ai ngā kaute, he whā tekau mā rima ki ia kapa i te otinga.