Ka eke pea ngā Hawks ki ngā whiringa toa

Aroha Treacher
  • Te Tai Rāwhiti

Kei te rere te tira Hawks nō Te Matau a Māui i tō rātou tau takaro angitū rawa mai i te tau rua mano tekau mā whā, kei te puna toa rātou i tēnei wā nā tō rātou tūnga tuawhā i te whakataetae, he pupuri tonu i taua tūnga ka tika i tō rātou tukinga ki ngā Canterbury Rams hei te pō nei.

"Ko te tūnga tuawhā mātou, nā, ki te pupuri tonu i taua tūnga me turaki i a Canterbury," tā Angus Brandt, kaitākaro Hawk.

Koinei te tau mō ngā ekenga ikeike mai anō i te kuhunga o te kapa ki te whiringa matua ki ngā Saints i te tau rua mano tekau mā whā, heoi he hinganga kē te hua i taua wā.

"Ko te mea nui ko te wairua hari o te tira nei, ahakoa ngā wikitoria me ngā hinganga kei rongo tātou i te wairua tau," tā Zico Coronel, kaiako matua.

Arā noa atu ngā raru i ngā tau nei, i kore wikitoria rātou i te tau rua mano tekau mā ono, e toru noa iho ngā wikitoria i te tau rua mano tekau mā whitu, heoi he whitu ki ono tō rātou noho i tēnei wā.

"Ae, i wehe ngā kaitautoko-a-pūtea me ngā kaitaunaki hoki, heoi ki te eke mātou ki te whiringa toa ka hoki mai pea aua tāngata," tā Brandt..

I tēnei tau tākaro kua turakina kētia ngā Rams e ngā Hawks, ko te whai kia pērā tonu te hua ki Ahuriri i te pō nei.