Ka ārai tētahi kōtiro i tōna māuiuitanga kia whakataetae tonu i ngā taumāhekeheke waka ama

  • Waikato/Te Waiariki

Kua eke ngā wāhanga takawaenga me J16 ki te wai, i te Whakataetae Waka Ama ā-motu ki Karāpiro i te rangi nei. I hoe ko ngā toa o ēnei wāhanga i ngā reihi W12 rima rau mita, ngā reihi W6 rima rau mita me ngā reihi W6 kotahi mano mita te roa.

Mārama kitea ana ngā pūkenga o ngā rangatahi i runga i a Karāpiro i te rangi nei, he pātata rawa ngā whiringa toa hei whakakitenga pai mā ngā kaimātakitaki. Ā haunga rā ngā wikitōria ki runga i te wai, i tūtaki atu a Te Kāea ki tētahi kōtiro kua angitū kē nā tana taenga mai ki konei.

Ahakoa ko te nuinga o te wā he hākinakina ā- kapa nei te waka ama, hei āpōpō ka tū ko ngā reihi takitahi i ngā reanga katoa mai i ngā takawaenga atu ki ngā kaumātua.

E whitu marama ki muri he hīkoi anō te paetawhiti ā Tomairangi Pihema Brown, i tēnei rangi kei te hoe ia ki te Whakataetae Waka Ama ā-motu.

Hei tā Pihema Brown, "He rawe ki te mahi, ka taea koe te hīkoi haere me o hoa i te wā kahore koe i te reihi, me he mahi tīma me mahi tō tīma katoa."

Tekau mā tahi te pakeke o te kōtiro nō Tūranganui ā Kiwa, kua pāngia ia e te mate huangō me te mate bronchiectasis.

I te Haratua kua hori i pākinotia ia e te huango, he āhuatanga i mongamonga ai te whānau, he āhuatanga anō i mīharo ai tana hokinga mai ki te waka ama.

Ahakoa kua roa nei a Tomairangi e pākinotia ana e te huangō kua kino ake i ngā tau e toru. Hei tā tōna māmā, a Sharon Pihema, kua whai painga ia i te waka ama.

E toru tau a Tomairangi e hoe ana i raro i te maru o Mareikura, ko tana kapa a Ngā Parirau o Mareikura e whakataetae ana i te wāhanga takawaenga i tēnei wiki.

Ki tā Pihema Brown, "Ōku hoa, ka mōhio rātou kei te māuiui ahau, ka awhi rātou i ahau i te wā i māuiui ahau. Ōku mātua ka tango rātou i ahau ki te hōhipera i te wā i mauiui ahau, ka awhi rātou i ahau."

He maha ngā momo angitū i te ao hākinakina engari ko Tomairangi tētahi whakahirahiratanga ki a tātou katoa.