Ka ārahina te haka hōu o te Kapa Kiwi e Luke

Tamati Tiananga

He hua kaha rawa ki ngā Kiwi i mua i te tīmatatanga o te whakataetae Ipu Rīki o te Ao i Ingarangi hei ngā rā whakatā e tū mai nei.

I toa i a rātou tā rātou tukinga whakawai ki te kapa o ngā Kuki Airani i Doncaster i te ata nei.

He haka hōu hei kīnaki i tā rātou e wawatatia nei, kia mau tonu ki te Ipu o te Ao.

Ahakoa he tukinga whakaharatu noa, mārakerake te kite atu, he whakapeto ngoi te mahi kia whakatīnana ai ngā tūmomo tākaro kua akona.

Nā te whakaheke tōtā, te whai torohaki me te ūpoko mārō, kua tere pai ai te waka o te kapa Kiwi.

Me te aha, he rua tekau mā whā ki te kore ngā tatau ki Aotearoa.  Ko Jason Nightingale, ko Elijah Taylor, ko Manu Vatuvei rātou ko Bryson Goodwin i whai piro.

He ūnga ki uta e rua, mā Nightingale kātahi, mā Goodwin kā rua, i te wāhanga tuarua, kia oti ai ngā pironga e iwa katoa a ngā Kiwi.

I tohua ko Issac Luke te kaitākaro nanakia rawa atu o te tukinga.

Ināianei ka hei atu te titiro a te kapa Kiwi ki te tukinga tuatahi ki a Hāmoa hei tēnei Rātapu, ki te Taiwhanga o Halliwell Jones, i Warrington.