I wikitōria e Te Arawa te tukinga ki a Te Rarawa i te whakataetae pā whutupaoro Māori ā-motu

Mere McLean
  • Waikato/Te Waiariki

Neke atu i te whitu tekau ngā tīma i tākaro ki roto i te whakataetae pā whutupaoro Māori ā-motu i tū ki Rotorua i ngā rangi okioki, ā ko ētahi i whakawhiti noa mai i Ahitereiria.

I te tākaro whiringa toa i te wāhanga ki ngā tāne inanahi, i tuki a Te Arawa ki Te Rarawa.

He whatitiri ki te rangi, ko Te Arawa ki te whenua. Koia pū te āhua i tā rātou tūkitanga atu ki Te Rarawa inanahi nei, i te whiringa whakamutunga a ngā tane ki ngā Whakataetae Pā Whutupōro Māori. 

E rua mineti noa i pau, ka whara tētahi o Te Arawa ka heke iho i te papa, engari ka ū tonu a Te Arawa ka wāhi i te rārangi tuatahi.

He pai hinga, pai tū te āhua mō Te Rarawa i whawhai ururoa i te  wāhanga tuatahi o tēnei tūtakinga.

Engari i kaha rawa a Te Arawa, ka puta ko rātou i tēnei hauwhā, e whā ngā kaute ki tō Te Rarawa kotahi.

E ai ki a Kimo Houltham, “Tino pai ngā kaiwhakawā i tēnei kēmu, ā, pai tā rātou ārahi i te kēmu. Ki ōku nei whakaaro ko mātou te kapa o Te Arawa i te mea he tino pai to mātou hononga hei hoa, nō reira i āhei mātou te kōrero ki a mātou anō me te kore kupu, mā ngā karu pea, haere ki te taha maui, ki te taha katau ae, ki tōku nei whakaaro koira te mea nui ko to mātou hononga ā hoa.”

Ki te wāhanga tuarua o te tūkinga nei kounga ana ia kapa. Upoko pakaru ana a Te Rarawa kia pae rātou ki uta, engari tē taea a Te Arawa te whakahinga, ko rātou kē i eke.

Hei tā Houltham, “Mīharo katoa ana mātou i toa te kapa o Te Arawa te wā tuatahi kei te hau kainga kei Puarenga kei te papa o Te Arawa, no reira i tēnei wā koira to mātou whainga matua i te timatanga o te whakataetae nei kia toa mo tātau katoa i te rā nei. 

Ko ngā kaute whakamutunga, e ono ngā piro ki Te Arawa, Te Rarawa e rua.