I whakauru atu tētahi tāne i te whakataetae Ironman kia whakaheke taumaha, kia whakapiki hauora hoki

He whakaheke taumaha, he whakapiki hauora. Koia nei te take kua whakarite a Johnnie Freeland o Ngāi Tūhoe, Ngāti Te Ata, kia whakauru atu aia ki te whakataetae Ironman hei te marama o Poutū-te Rangi.

E whā tekau mā whā ōna tau, neke atu i te kotahi rau toru tekau kirokarama tōna taumaha, a ko te rārangi mutunga te whainga nui a Johnnie ehara ko te wikitōria.

Ko te whakataetae Tangata Rino he māmā noa iho mō ētahi, engari mō Johnnie Freeland, he maunga teitei, he hīkoi roa kei mua i te aroaro.

E ai ki a Freeland, “Ko te kaupapa matua ki au ko te whai oranga, mō tōku tinana, mō tōku wairua, mō tōku hinengaro e pā ana ki te whakapakari. “

Hei tā Bernard Te Paa, “Ono tekau mā rima ngā Māori e whai ana i te īngoa Tangata Rino, i roto i tēnā ko Johnnie tētahi o ngā tino pou mō te kaupapa nei.”

Tua atu i ngā tautoko a te roopu "Team Bros" i whakawhiwhia a Johnnie ki tetahi karahipi, mai ia Ironman Aotearoa. E 28 ngā whakataetae Ironman i oti ia Tony Jackson i mua o tōna matenga a nāna te karahipi i tukua nei ki a Johnnie.

E ai ki a Freeland, “Ko tērā te tohu whakamaumahara ko tērā tangata rongonui i awhi i manāki aia i ngā tangata o ngā hapori ki te whai ake i te maunga teitei o te Ironman.”

Ki tā Maria Walker nō Ironman NZ, “He ringa raupa pērā tonu ia Johnnie, nā reira ka tino koa a Tony kia kite ia Johnnie e whakawhiti ana i te rārangi mutunga.”

Otirā, ehara ko te wikitōria, me te taitara Tangata Rino te mea nui, te whainga nui.

Ko Freeland tērā e mea ana, “Kei te haere hīkoi au e pā ana ki te kaupapa, i te kaukau i te pahikara i te omaoma e pā ana ki te whakapakari tinana, ko tērā te take nui ki au.”