I turaki a Rotorua i a Kirikiriroa i te Whakataetae Pā Whutupōro Kura Tuarua

Te Kāea

I haere rae ki te rae te Kura Tamatāne o Rotorua me te Kura Tamatāne o Kirikiriroa ki te whiringa toa tamatāne i te whakataetae pā whutupōro o ngā Kura Tuarua o Aotearoa i ngā rā whakatā.

I kaha tā Kirikiriroa kōkirikiri i te timatanga, engari, tē tutuki i a rātau tā rātau whakamātaunga e rua ki te rārangi. 

He huinga pā ka hipa, ka wātea te huarahi e māmā ake ai te kaitūtei o Kirikiriroa oma ki tua i te rārangi ārai o Rotorua. Ka whāngai atu te pōro ki tōna hoatākaro, kātahi ka whai piro.

Nā te ngoikore o te rārangi ārai a Rotorua i waimarie anō ai a Kirikiriroa. 

He utu nui i pura ake. I hapa a Kirikiriroa i tō rātau rārangi rima mita, mea rawa ake, i whakawhiwhia ki a Rotorua tā rātau pironga tuatahi nā tēnei whiu toru tekau mita ki te parirau.

I angitū anō te parirau matau o Rotorua kātahi ka orite ngā tatauranga ki te rua tekau. 

I Hoki mai a Kirikiriroa ki te whai piro. I mua kē tō rātau ihu i te wehengarua he toru ki te rua, engari i eke a Rotorua i te huinga pā tuatahi o te haurua tuarua. 

Nā ngā poumua o Kirikiriroa te kēmu i ārahi kia whai i tā rātau piro tuawhā, heoi, nā te pōhēhē ki waenganui i tō rātau rārangi ārai i whai hua anō ai a Rotorua. I orite anō ngā tataranga, he whā ki te whā.

I pērā ngā tatauranga i te mutunga o te kēmu. Nā konā ka puta he wā tāpiri.

Nā Kirikiriroa tēnei wāhanga i timata. Heoi, nā te hapa nui i noho kore piro ai rātau. 

I eke anō a Rotorua nā tō rātau manawatītī i roto i ā rātau mahi kōkirikiri, nā wai, i toa.