Kaupapa: Waka Ama

I tū ngā whiringa toa tamariki W6 i te rā nei ki te Whakataetae Waka Ama ā-motu

  • Waikato/Te Waiariki

Ko te rangi tuarua tēnei o te Whakataetae Waka Ama ā-motu ki Karāpiro, ā, nō te rangi nei tū ai ngā whiringa toa tuatahi tērā a ngā tamariki me ngā wāhanga takawaenga.

I tū ngā whiringa toa tamariki W6 i te rā nei, e rua rau rima tekau mita te roa, ā, ko te kapa kōtiro nō Mareikura i puta rangatira.  Otirā ki te taha o ngā tamatāne ko ngā tama nō Ōtaki tērā i eke panuku.  He wikitōria i whakahīhī ai tō rātou karapu ā Te Rau o te Aroha ki Ōtaki.

Koinei tā rātou whakataetae ā-motu tuatahi, koinei hoki tā rātou mētara koura tuatahi.

Koinei te mētara koura tuarua mō tō rātou karapu a Te Rau o Te Aroha ki Ōtaki i te whakataetae ā-motu nei.

Ko Ōtaki tētahi o ngā karapu ono tekau mā ono nō Aotearoa me tāwāhi e whakataetae ana i tēnei wiki.  I tērā tau tokoono noa a rātou kaihoe ki konei, engari i tēnei tau, kua rahi ake ki te kotahi rau rua tekau.

Heoi, he mahi taumaha mā rātou ki te whakaharatau ki te kāinga ki Ōtaki.

Heoi kua kitea kētia ngā hua o tērā mahi rangatira, i te ekenga o te kapa tamatāne nei i te whiringa toa i te rangi nei.

Ko te manako o Ōtaki ka kawea tērā mauri toa o te tau rua mano tekau mā rima i te katoa o te wiki.

Ka mutu, kua tō te rā ki runga i ngā rēhi mō ngā tamariki, engari haere tonu ana ngā wāhanga takawaenga āpōpō, me te tīmatatanga o ngā wāhanga J16.  Kahore e kore he rangi harikoakoa anō ki konei ki Karāpiro āpōpō.