I toa te rōpū haupoi toi o Aotearoa i tā rātou tākaro ki a Hong Kong

Ehara te haupoi tio i te hākinakina mātua ki konei, heoi taihoa rā. I whakakotahi te kapa ā-motu tekau mā waru tau me raro iho i tērā wiki kia whakarite ai mō te whakataetae ā-ao i tēnei wiki.

I tūtaki rātou ki te kapa nō Hong Kong inapō, ā, he tukinga tukituki te kitea ā mutu noa.

Mārakerake ana te kitea, nā te aha i meatia ai ko te haupoi reti hukapapa tētahi o ngā hākinakina pākaha o te ao.

Tekau mā rima tau te pakeke o Mak Rawiri, kua tākaro ia i te haupoi reti hukapapa mō te waru tau, ā, e ngākaunui ana ia ki te tukituki me te hākinakina.

Hei tā te kaiako a Jonathan Albright, he nui ngā pūmanawa o ngā tāngata o Aotearoa pērā i a Mak.

Otirā, i kitea ērā pūkenga i a Aotearoa i te wahanga tuatahi o tēnei tukinga i te wahanga 3B o te ao, e toru ā rātou piro, nā, ka ārahi ake rātou i te tukinga e toru ki te kotahi i te whakatā tuatahi.

Heoi, upoko pakaru ana a Hong Kong, i whawhai rātou ki ngā ārai o te hau kāinga kia whai i o rātou ake piro.

He tukinga whakahirahira mō ngā kapa e rua nei kia eke ai ki te wahanga 3A engari ko te kapa kāinga tērā i eke ki taumata kē kia wha anō ngā piro. I eke panuku a Aotearoa e waru ki te rima.

Ahakoa he mahi nui kei mua i te aroaro kia rite ai mō te tukinga ki te kapa nō Turkey a te pō āpōpō, ka whakamihia ēnei kaitākaro e ō rātou whānau mō to rātou angitū ki runga ake i a Hong Kong.